बाजुरा, साउन १९,
बाजुरामा जङ्गली विषालु च्याउ सेवन गर्दा एक पुरुषको मृत्यु भएको छ भने उनकी श्रीमती गम्भीर बिरामी परेकी छन्।
जिल्लाको बडिमालिका नगरपालिका–७ धम्कनेका ५१ वर्षीय रामे थापा र उनकी करिब ५० वर्षीया श्रीमती नाम्सरी थापाले जङ्गलबाट ल्याएको विषालु च्याउ खाएपछि सोमबार साँझ एक्कासि बिरामी परेका थिए।
दुवैलाई राति करिब १०ः२० बजे उपचारका लागि जिल्ला अस्पताल मार्तडी पुर्याइएको थियो। उपचारका क्रममा चिकित्सकले राति १०ः४० बजे रामे थापालाई मृत घोषणा गरेका हुन्। प्रहरीका अनुसार नाम्सरी थापाको अवस्था गम्भीर रहेको छ। उनको जिल्ला अस्पताल मार्तडीमा उपचार भइरहेको छ।
घटनाको जानकारी प्राप्त हुनासाथ जिल्ला प्रहरी कार्यालय बाजुराबाट प्रहरी नायब उपरीक्षक शैलेश्वरी बोहराको नेतृत्वमा प्रहरी टोली घटनास्थल तथा अस्पताल पुगेको थियो।
मृतकको शव पोस्टमार्टमका लागि जिल्ला अस्पताल मार्तडीमा राखिएको छ भने घटनाबारे प्रहरीले थप अनुसन्धान गरिरहेको जनाएको छ।
